قوستانايلىقتار اكتەر ءانۋار بورانباەۆتى ەسكە الدى

كورمەنى تاماشالاپ بولعاننان كەيىن, كوپشىلىك ءانۋار بورانباەۆتى ەسكە الۋ  كەشىنە جينالدى. وعان اكتەردىڭ  تۋعان-تۋىسى, اۋىلداستارى, جارى اقبوپە كەلدى. ەستەلىكتەر ايتىلدى. ولار ءانۋاردىڭ تالانتىمەن قوسا, قاراپايىمدىلىعىن, ادامگەرشىلىگىن كوبىرەك ەسكە الدى. سىنىپتاسى حايروللا حاسەنوۆ, تۋىسى تارعىن ابەنوۆتىڭ, ءىنىسى قانات بورانباەۆتىڭ, جارى اقبوپە بورانباەۆانىڭ, تاعى باسقالاردىڭ  اسەرلى ەستەلىكتەرىن كوپشىلىك ىنتامەن تىڭدادى.

– بالالىق شاعىمىز بىرگە ءوتتى. ول كەزدە مەكتەپتى بىتىرگەندەردىڭ بار ارمانى وقۋعا ءتۇسۋ ءۇشىن الماتىعا بارۋ بولاتىن.  اكە-شەشەمىز ءۇشىن وقۋدىڭ ەڭ كۇشتىسى اگرونومدىق, ەكونوميستىك, زووتەحنيك, مال دارىگەرى سەكىلدى  ماماندىق الاتىن وقۋلار ەدى.  كوپشىلىگىمىز  اگرونوم, مەحانيك, زووتەحنيك بولامىز دەپ الماتىداعى ينستيتۋتتارعا تۇستىك. ءانۋار دا ۇلكەندەردىڭ قالاۋىمەن  اۋىل شارۋاشىلىعى ينستيتۋتىنىڭ  اگرونوميا فاكۋلتەتىنە تۇسكەن بولاتىن. بىراق ونى العاشقى كۋرستاردان تاستاپ كەتتى دە, جۇرەك قالاۋىمەن ونەر جولىن قۋدى. ول اۋىلدا جۇرگەندە ادەبيەتتەن مىقتى بولاتىن, – دەيدى سىنىپتاسى حايروللا اعاي.

– ءانۋار اۋىلىن, تۋعان جەرىن وتە جاقسى كورەتىن. اۋىلعا بارىپ, ءانۋاردىڭ ءىزى قالعان توپىراقتى باسىپ كەلە جاتىرمىز. ءانۋاردىڭ بارلىق رولدەرى كوز الدىمدا. ابايدى, سىرىمدى, تاعى باسقا  كوپتەگەن رولدەردى قالاي ويناعانى كورەرمەننىڭ ەسىندە. كينوداعى ەڭبەكتەرى ءوز الدىنا ءبىر توبە. ول تەگىن ەمەس, تەكتى ادام  ەدى. ومىردە, ۇيدە دە  وتە جاقسى ادام ەدى. ماعان دەگەن ىقىلاسىن قالاي ۇمىتۋعا بولادى؟  ارينە انۋارمەن بىرگە وتكەن ۋاقىتىمدى ناعىز باقىتتى كەزدەرىم دەپ بىلەمىن. ءانۋارداي جىگىتكە جار بولۋ بار ايەلدىڭ ارمانى ەكەنى راس. اتتەڭ, قايتەيىن, تاعدىر كوپ كوردى, كوپكە ۇزاتپاي الىپ كەتتى. وسى كەشتى  ۇيىمداستىرعان اۋداندىق, وبلىستىق كىتاپحانا ۇجىمدارىنا, اۋدان باسشىلىعىنا  ۇلكەن راحمەتىمدى ايتامىن, – دەدى  اقبوپە بورانباەۆا.

كەشتە ءانۋار بورانباەۆ تۋرالى  دەرەكتى فيلم كورسەتىلدى.

ءنازيرا جارىمبەت,

«ەگەمەن قازاقستان»

قوستاناي